இன்றைய தினம்

        13 ஆகஸ்ட் 1889

நாணயம் போட்டு பேசும் தொலைபேசிக்கு வில்லியம் கிரே என்ற அமெரிக்கர் காப்புரிமை பெற்றார். இவர் உருவாக்கிய பேசி முடித்தபின் நாணயம் போடவேண்டிய தொலைபேசி, கனெக்டிகட்டில் ஹார்ட் ஃபோர்ட் வங்கியில் அமைக்கப்பட்டது. மொபைல் போன்களின் வரவால் தற்போது இவை மறைந்துவந்தாலும் நாணயம் போட்டு இயங்கும் எந்திரங்கள் உலகெங்கும் ஏராளமாகச் செயல்பட்டு வருகின்றன. குறிப்பாக, நாணயம் போட்டு விளையாடும் வீடியோ கேம்கள் மிகப் புகழ்பெற்றவை.

     நாணயம் போட்டு பெறும் சேவை என்பது உண்மையில் கி.பி. முதல் நூற்றாண்டிலேயே தொடங்கிவிட்டது. ரோமப் பேரரசின் மாநிலமாக இருந்த எகிப்தில், அலெக்சாண்ட்ரியாவின் நாயகன் என்பவர் உருவாக்கிய எந்திரம், தேவாலயத்தின் புனித நீரை வழங்கப் பயன்படுத்தப்பட்டன. நாணயம் போட்டதும் புனித நீருள்ள குடுவை சாய்ந்து புனித நீரைத் தரும் நாணயத்தின் எடையளவுக்கு புனித நீர் வெளியேறியதும் நாணயம் உள்ளே விழுந்ததும் குடுவை நிமிர்ந்துவிடும்! 1615-ல்  புகையிலை விற்கும் எந்திரமும், 1822-ல் செய்தித்தாள் விற்கும் எந்திரமும் உருவாக்கப்பட்டன.

    1867-ல் சிமியோன் டென்ஹாம் என்ற ஆங்கிலேயர் உருவாக்கிய அஞ்சல் தலை விற்கும் எந்திரமே முதல் முழுமையான தானியங்கி விற்கும் எந்திரமாகும். சிகரெட், ஆணுறை, நொறுக்குத்தீனிகள், நுழைவுச்சீட்டுகள் முதலானவற்றை விற்கும் எந்திரங்கள் மட்டுமன்றி, சில்லறை வழங்கவும் எந்திரங்கள் உள்ளன. சுடச்சுட, பிரெஞ்சு ஃப்ரை, பீட்சா ஆகியவற்றை செய்து தரும் எந்திரங்கள் கூட உள்ளன. 1950-70 காலகட்டத்தில் ஆயுள் காப்பீடு வழங்கும் எந்திரங்கள் கூட இருந்தன. விமான நிலையங்களில் அமைக்கப்பட்ட இந்த எந்திரங்களில், அப்பயணத்திற்கு  காப்பீடு பெறலாம்.

   உலகிலேயே மிக அதிகமாக ஜப்பானில் 23 மனிதர்களுக்கு ஓர் எந்திரம் என்ற வீதத்தில், சுமார் 55லட்சம் விற்கும் எந்திரங்கள் உள்ளன. தற்காலத்திய விற்கும் எந்திரங்கள், கேமரா, பிற உணர்விகள் ஆகியவற்றின் மூலம் வாங்குபவர்கள், சூழ்நிலை உள்ளிட்டவற்றை கணித்து நுகர்வோர் நிர்வாகத்திற்கு உதவுகின்றன. நாணயம் போட்டு பேசும் தொலைபேசிகள் மறைந்தாலும், விற்கும் எந்திரங்கள் பிற துறைகளில் வளர்ந்தே வருகின்றன.