Saturday, 25 December 2021

அறிவோம் தெளிவோம்

கிறிஸ்துமஸ் முதன்முறையாக் கொண்டாடப்பட்டது. ரோமில் கொண்டாடப்பட்ட இதுவே முதன் முதலில் பதிவுசெய்யப்பட்டுள்ள கிறிஸ்துமஸ் விழாவாகும்.

கிறுத்துவின் சரியான பிறந்த நாளுக்கான பதிவுகள் இல்லாத நிலையில், குளிர் காலம் முடிந்து சூரியத் திருப்பம் நடைபெறுவதாக ரோமானியர்கள் கணித்திருந்த டிசம்பர் 25 தேர்ந்தெடுக்கப்பட்டது.சூரியக்கதிர்கள் புவியின் மீது விழும் திசை மாறும் நாள் சூரிய திருப்பம் ( சோல்ஸ்டைஸ்) என்று அழைக்கப்படுகிறது. மாறிக்கொண்டே வந்த சூரியக் கதிர்களின் கோணம், திரும்பும் நாளில், மாறாமல் நிற்பது போலத் தோன்றுவதால் லத்தீனில் சோல்( சோலார்!) என்றால் சூரியன், சிஸ்டியர் என்றால் நகராமல் நிற்றல் என்பதிலிருந்து சோல்ஸ்டைஸ் என்ற பெயர் உருவானது.

கிறிஸ்துவுக்கு முன்பிருந்தே டிசம்பர் 25 இல் தோற்கடிக்க முடியாத சூரியன் ( சோல் இன்விக்டஸ்) என்றழைக்கப்பட்ட சூரியக் கடவுளின் பிறந்த நாளாக நட்டாலிஸ் சோலிஸ் இன்விக்டி என்ற பண்டிகையைக் கொண்டாடிவந்தனர். நேர்மையின் சூரியன் என்று கிறிஸ்துவ சூரியனுடன் ஒப்பிடும் பல செய்யுள்கள் விவிலியத்தில் காணப்படுவதால், இத்தேதி தேர்ந்தெடுக்கப்பட்டிருக்கலாம் என்று நம்பப்படுகிறது.

கன்னி மரியா தூய ஆவியால் கருவுற்று, இயேசுவுக்கு தாயாவார் என்று தேவதூதர் கேபிரியேல் அவருக்கு அறிவித்த "இயேசு பிறப்பின் முன்னறிவிப்பு" மார்ச் 25 இல் கொண்டாடப்படுவதிலிருந்து ஒன்பது மாதங்கள் கழித்து டிசம்பர் 25 வருவதாலும் தேர்ந்தெடுக்கப்பட்டிருக்கலாம் என்றும் கருதப்படுகிறது.

இந்நாள் சம இரவு (ஈக்வினாக்ஸ்) நாளாக இருப்பதிலிருந்து சூரியனையொட்டிய பண்டைய விழாக்களே, வடிவம் மாறின என்பதையும் புரிந்து கொள்ள முடிகிறது. சூரியன் நிலநடுக்கோட்டை கடந்து செல்வதால் இரவும் பகலும் சமமாக இருக்கும் சம இரவு நாள் மார்ச்சிலும், செப்டம்பரிலும் வருகிறது. லத்தீனில் ஏக்வஸ் என்றால் சமம், நாக்ஸ் என்றால் இரவு என்பதிலிருந்து ஈக்வினாக்ஸ் என்ற சொல் உருவானது. யூதர்களின் நம்பிக்கை யின்படி காப்பவரும், விடுதலையளிப்பவருமாக கருதப்படுபவர் மெசையா, இந்த எபிரேய சொல்லுக்கான கிரேக்க மொழி பெயர்ப்பு கிறிஸ்ட்டோஸ் என்பதிலிருந்து, கிறுத்துவின் வழிபாடு ( மாஸ்) என்ற பொருளில், கிறிஸ்ட்டஸ் - மெஸ்லே என்ற பெயர் முதன் முதலில் 1038 இல் தான் பயன்படுத்தப்பட்டுள்ளது. கிறிஸ்ட்டோஸ் என்பதன் முதல் எழுத்தான கி என்பது கிரேக்க எழுத்தில் ஆங்கில எக்ஸ் வடிவிலிருப்பதால் எக்ஸ் - மஸ் என்று அழைக்கப்பட்டது.

Tuesday, 30 November 2021

இன்றைய தினம்

தாவரங்களுக்கும் உயிர் உண்டு என்று கண்டுபிடித்த அறிவியலாளர் சர் ஜெகதீஷ் சந்திரபோஸ் பிறந்த தினம் - நவம்பர் 30:

வங்காளத்தின் (தற்போதைய வங்கதேசம்) விக்ரம்பூரில் பிறந்தவர். எதையும் உற்றுநோக்கும் குணமும், நிறைய விஷயங்களைத் தெரிந்துகொள்ள வேண்டும் என்ற ஆர்வமும் இயற்கையிலேயே இருந்தது. ஓயாமல் கேள்வி கேட்டாலும் சளைக்காமல் பதில் சொல்லக்கூடிய தந்தை கிடைத்தது அவரது அதிர்ஷ்டம்.

பட்டப்படிப்பை முடித்ததும் கேம்ப்ரிட்ஜ் பல்கலைக்கழகத்தில் அறிவியல் கற்றார். வைஸ்ராய் சிபாரிசுடன் கல்கத்தா மாநிலக் கல்லூரியில் பேராசிரியராக நியமிக்கப்பட்டார். இந்தியர்கள் திறன் குறைந்தவர்கள் என்ற பிரிட்டிஷ் அரசு, அதே பதவி வகிக்கும் ஆங்கிலேயரின் சம்பளத்தில் மூன்றில் ஒரு பங்குதான் கொடுக்கப்படும் என்றது.

கஷ்டமான சூழலிலும், தன்மானத்தை விட்டுக்கொடுக்காத போஸ் 3 ஆண்டுகள் சம்பளமே வாங்காமல் வேலை பார்த்தார். அறிவாற்றல், கற்பிக்கும் திறனால் பேரும் புகழும் பெற்றார். தவறை உணர்ந்த கல்வித் துறை இயக்குநர் தனது முயற்சியால் முழு சம்பளம் கிடைக்க ஏற்பாடு செய்தார். அவருக்கான 3 ஆண்டு ஊதியத்தையும் மொத்தமாக வழங்கியது அரசு.

இந்த பணத்தில் தன் வீட்டிலேயே ஆராய்ச்சிக்கூடம் அமைத்தார். தன் ஆயுள் முழுவதையும் ஆராய்ச்சிக்கே அர்ப்பணிப்பது என 1894-ல் முடிவெடுத்தார். முதலில் மின்சாரம் பற்றி ஆராய்ந்தார். மின் அலைகள், கம்பிகளின் உதவியின்றி பொருட்களைக் கடந்து செல்லக்கூடியவை என்று கண்டறிந்தார்.

மின்காந்த அலைகளின் பகுதி ஒளித் தன்மைகளை (quasi-optical) கண்டறியும் கருவியைக் கண்டுபிடித்தார். மிகக் குறைந்த அலை நீளம் கொண்ட நுண்ணலைகளை உருவாக்கும் இயந்திரத்தை முதன்முதலில் வடிவமைத்தார்.

போட்டோகிராபிக் கோட்பாட்டை உருவாக்கினார். இவரது ஆராய்ச்சி பற்றிய கட்டுரைகள் ராயல் சொசைட்டி இதழில் வெளிவந்தன. லண்டன் பல்கலைக்கழகம் இவருக்கு ‘டாக்டர் ஆஃப் சயின்ஸ்’ பட்டம் வழங்கியது.

பல நாடுகளின் அறிவியல் கழகங்களில் சொற்பொழிவுகள் நிகழ்த்தினார். இந்தியாவின் புகழ் உலகம் முழுவதும் பரவியது. பல பல்கலைக்கழகங்கள் டாக்டர் பட்டங்களை வழங்கின. விருதுகள் குவிந்தன.

இவரது ஆராய்ச்சி தாவரவியல் பக்கம் திரும்பியது. தாவரங்களுக்கு உயிர், உணர்ச்சிகள் உண்டு என்பதை ஆதாரங்களுடன் பாரீஸ் மாநாட்டில் நிரூபித்தார். இந்த உண்மைகளை கண்கூடாகக் காட்ட உதவும் ‘ரெஸனன்ட் ரெக்கார்ட்’, ‘கிரெஸ்கோகிராப்’ ஆகிய கருவிகளை அரும்பாடுபட்டு உருவாக்கினார்.

‘ரெஸ்பான்ஸ் இன் லிவிங் அண்ட் நான் லிவிங்’, ‘த நெர்வஸ் மெக்கானிஸம் ஆப் பிளான்ட்ஸ்’ ஆகிய 2 நூல்களும் இவருக்கு உலகப் புகழைப் பெற்றுத் தந்தன.

ஆண்டு வருமானத்தில் தனது அத்தியாவசியத் தேவைக்கு ஐந்தில் ஒரு பங்கை வைத்துக்கொண்டு எஞ்சிய தொகையை அறிவியல் பயிலும் மாணவர்களுக்குச் செலவழித்தார். இந்திய நாட்டின் வளர்ச்சிக்காக பல லட்சம் ரூபாய் உயில் எழுதிவைத்த இந்த தேசபக்த விஞ்ஞானி 79 வயதில் காலமானார்.

Sir Jagadish Chandra Bose,(30 November 1858 – 23 November 1937), was a Bengali polymath, physicist, biologist, biophysicist, botanist and archaeologist, and an early writer of science fiction. Living in British India, he pioneered the investigation of radio and microwave optics, made significant contributions to plant science, and laid the foundations of experimental science in the Indian subcontinent.

IEEE named him one of the fathers of radio science. Bose is considered the father of Bengali science fiction, and also invented the crescograph, a device for measuring the growth of plants. A crater on the moon has been named in his honour.

Saturday, 27 November 2021

அறிவோம் தெளிவோம்

விமானம் செய்யப்படும் உலோகம்

பொதுவாக நிர்மாணப் பணிகளில் இரும்பும், உருக்கும் மிக அதிக அளவில் பயன்படுத்தப்படுகின்றன. இரும்பு கடினத் தன்மையும் பலமும் கொண்டது. ஆனால் இரும்பு துருப்பிடிக்கும். அதன் எடையும் அதிகம். விமானம் செய்வதற்கு உறுதியானதும் எடை குறைந்ததுமான உலோகம் வேண்டும். இரும்பும், அலுமினியமும் ஒரு குறிப்பிட்ட அளவு இருக்கிறது என்று வைத்துக்கொள்ளுங்கள். இரும்பின் எடையில் ஏறத்தாழ மூன்றில் ஒரு பங்கு எடைதான் அலுமினியம் இருக்கும். ஆட்களை ஏற்றிச் செல்லக்கூடிய பறக்கும் பலூன்களைத் தயாரிக்கத் தொடங்கியபோது, ஏற்ற கனமற்ற உலோகத்தைக் கண்டுபிடிக்க வேண்டிய கட்டாயம் ஏற்பட்டது.

அலுமினியம் துருப்பிடிக்காது. இரும்பு துருப்பிடித்து படல் படலாகப் பெயர்ந்து விழும். அப்போது அதன் அடியில் உள்ள படலம் மீண்டும் துருப்பிடிக்கும். அலுமினியம் பூமியில் சாதாரணமாகக் காணப்படுகிற ஒன்றுதான். இரும்பைவிட இரண்டு மடங்கு அதிகமான அலுமினியம் பூமியில் உண்டு. ஆனால் தொடக்க காலத்தில் அதை மற்ற தாதுக்களிலிருந்து பிரித்து எடுப்பது சிரமமாக இருந்தது. அதனால் அலுமினியம் மிகவும் அதிகமான விலைக்கு விற்றது. "எலக்ட்ரோ லைட்டிக்' தொழில் நுட்பத்தைப் பயன்படுத்தத் தொடங்கிய பிறகு சுத்தமான அலுமினியம் நிறையக் கிடைத்தது. அப்போதுதான் அதை விமானங்கள் செய்யப் பயன்படுத்தத் தொடங்கினார்கள். தொடக்க கால விமானங்கள் மரத்தால் செய்யப்பட்டன.

சுத்தமான அலுமினியத்தைப் பயன்படுத்தி விமானம் செய்ய முடியாது. அது கொஞ்சம் மென்மையாக இருக்கும். எனவே சுலபமாக வளையும்; சுருளும். 1906 - ஆம் ஆண்டு ஜெர்மன்காரர்கள் இதற்கொரு வழி கண்டுபிடித்தார்கள். அலுமினியத்தில் கொஞ்சம் "மக்னீஷியம்' சேர்த்தால் அதன் கடினத் தன்மை அதிகரிக்கும். ஆனால் எடை அதிகரிக்காது. இந்தக் கலப்பு உலோகத்திற்கு "சுராலுமின்' என்று பெயர்.

இரண்டாம் உலகப்போரில் ஜெர்மானியர்கள் இந்தக் கலப்பு உலோகத்தைக் கொண்டு "டிரிஜிபிள்'களைத் (கட்டுப்படுத்த முடிகின்ற ஆகாயக் கப்பல்கள் -அஐத நஏஐடந)தயாரித்தார்கள். அவற்றைப் பயன்படுத்தி பிரிட்டனில் குண்டுபோட்டார்கள்.

அவற்றில் ஒரு ஆகாயக் கப்பல் அங்கேயே விழுந்து உடைந்தது. ஆங்கிலேயர்கள் உடனே ரசாயனப் பரிசோதனைகள் செய்து, அந்த ஆகாயக் கப்பலைத் தயாரிக்கப் பயன்படுத்திய உலோகம் என்னவென்று கண்டுபிடித்தார்கள். அதன் பிறகு சுராலுமின் உலோகத்தைப் பரவலாக உபயோகப்படுத்தத் தொடங்கினார்கள். இன்று வாக்குவம் கிளீனர் முதல் ராக்கெட் வரை தயாரிப்பதற்கு இந்த உலோகத்தைப் பயன்படுத்துகிறார்கள்.

இன்றைய தினம்

ஸ்வீடனைச் சேர்ந்த வானியலாளர், இயற்பியலாளர் மற்றும் கணிதவியலாளருமான ஆன்டர்ஸ் செல்ஷியஸ் (Anders Celsius) பிறந்த தினம் - நவம்பர் 27:

ஸ்வீடனில் உப்சாலா என்ற இடத்தில் பிறந்தவர் (1701). தந்தை உப்சாலா பல்கலைக்கழகத்தில் வானியல் பேராசிரியர். எனவே இவர் இயல்பாகவே கணிதம் மற்றும் அறிவியலில் திறமை பெற்றிருந்தார். சொந்த ஊரில் ஆரம்பக் கல்வி கற்றார்.

* அப்பா பேராசிரியராக இருந்த உப்சாலா பல்கலைக்கழகத்திலேயே இவரும் அறிவியலை முதன்மைப் பாடமாகப் படித்தார். 1730-ல் அதே பல்கலைக்கழகத்தில் வானியல் பேராசிரியராக நியமிக்கப்பட்டார். அங்கு பல ஆய்வுகளிலும் ஈடுபட்டார்.

* பூமியிலிருந்து சூரியன் இருக்கும் தொலைவை அளப்பதற்கான புதிய முறை தொடர்பான ‘நோவா மெத்தடஸ் டிஸ்டான்டியம் சொலிஸ் ஏ டெர்ரா டிடர்மினன்டி’ என்ற ஆய்வுக் கட்டுரையை வெளியிட்டார். சூரிய உதயம் (auroral phenomena) குறித்தும் ஆய்வுகள் மேற்கொண்டார். புவிமுனைச் சுடர்வு நிகழ்வு குறித்துப் பிற விஞ்ஞானிகளுடன் இணைந்து ஆய்வு மேற்கொண்டார்.

* வடமுனைச் சுடர்வுக்கும் (aurora borealis) புவி காந்தப் புல மாற்றங்களுக்கும் உள்ள தொடர்பை முதலில் கூறியவர் இவர்தான். வலிமையான இந்தச் சுடர்வுச் செயல்பாட்டின்போது, காந்த ஊசிகள் பெரிய அளவில் விலக்கமடைவதை இவர் கண்டார்.

* 1730களில் ஜெர்மனி, இத்தாலி, பிரான்ஸ் உள்ளிட்ட பல நாடுகளுக்குப் பயணம் மேற்கொண்டார். அப்போது புகழ்பெற்ற பல வானியலாளர்களுடன் இணைந்து பணிபுரிந்தார். 1736-ல் ‘ஃபிரான்ஸ் அகாடமி ஆஃப் சயின்சஸ்’ ஏற்பாடு செய்த அட்சரேகையின் கோணத்தை அளவிட உருவாக்கப்பட்ட குழுவில் இடம்பெற்றார். பூமியின் வடிவத்தைத் தீர்மானிப்பதற்கான ஆய்வுகளை மேற்கொண்ட இவர், 1738-ல் ‘டி அப்சர்வேஷனிபஸ் ப்ரோ டெல்லுரிஸ் டிடர்மினன்டா’ என்ற நூலை வெளியிட்டார்.

* புதிய வானியல் கண்காணிப்பு நிலையம் ஒன்றை உருவாக்குவதற்காக ஏராளமாக நிதி திரட்டினார். 1741-ல் உப்சாலா வானியல் ஆய்வகத்தை நிறுவினார். அங்கு தான் மேற்கொண்ட நீண்ட ஐரோப்பியப் பயணத்தின்போது மிகவும் பாடுபட்டுச் சேகரித்த புத்தம் புதிய தொழில்நுட்பத்தாலான வானியல் கண்காணிப்புக் கருவிகளைப் பொருத்தினார்.

* சில குறிப்பிட்ட நட்சத்திரங்களின் பிரகாசத்தை அளக்க முதன் முதலாக வண்ணக் கண்ணாடித் தட்டுகளைப் பயன்படுத்தினார். அதுவரை வெற்றுக் கண்களால்தான் இவை மதிப்பிடப்பட்டு வந்தன.

* மேலும் ஒளிமறைப்புகள் உள்ளிட்ட பல்வேறு வானியல் ஆய்வு தொடர்பான கருவிகளை உருவாக்கினார். வெப்பநிலையை அளக்க 1742-ல் ஒரு அளவுகோலை உருவாக்கினார். இது முதலில் ‘ஸ்வீடிஷ் தெர்மாமீட்டர்’ எனக் குறிப்பிடப்பட்டது. பின்னர், அது இவரது பெயராலேயே உலகம் முழுவதும் ‘செல்சியஸ் அளவுகோல்’ என்று குறிப்பிடப்படுகிறது.

* ஸ்வீடன் நாட்டுப் பொது நில வரைபடத்தை உருவாக்கப் பல புவிபரப்பு அளவீடுகளைக் கண்டறிந்தார். 1941-ல் ‘அரித்மேடிக்ஸ் ஃபார் தி ஸ்வீடிஷ் யூத்’ என்ற நூலை வெளியிட்டார். ஸ்வீடன் அரசு அறிவியல் கல்விக் கழகத்தின் உறுப்பினராகவும் செயல் பட்டார். வானியலில் கிரகணங்கள் மற்றும் பல்வேறு வானியல் பொருள்களைக் குறித்தும் கண்காணிப்புகளை மேற்கொண்டார்.

* இவரது மரணத்துக்குப் பிறகு வானியல் குறித்து இவர் எழுதி வைத்திருந்த ஏராளமான ஆய்வுக் கட்டுரைகள் வெளியிடப்பட்டன. 18-ம் நூற்றாண்டின் தலைசிறந்த வானியலாளர்களில் ஒருவரான ஆன்டர்ஸ் செல்ஷியஸ் 1744-ம் ஆண்டு காசநோயால் பாதிக்கப்பட்டு இறந்தார்.

Sunday, 14 November 2021

இன்றைய தினம்

1922- இன்சுலின் முதன் முறையாக ஒரு மனித நோயாளிக்கு செலுகடைப்பிடிக்கப்படுகிறது.டொராண்டோ பொது மருத்துவமனையில் ஒரு 14 வயது ( ஆம்! 14 வயது தான்!!) நீரிழிவு ( சர்க்கரை) நோயாளிக்கு செலுத்தப்பட்டது. அக்காலத்திலேயே, இளவயதில் நீரிழிவு இருந்துள்ளது என்பதுடன், கி.மு.1500 இலேயே எகிப்தில் நீரிழிவு பற்றிய குறிப்புகள் காணப்படுகின்றன.

அதே காலத்திய இந்திய மருத்துவர்களும் மதுமேகம் என்ற பெயரில் இந்நோயைக் குறிப்பிட்டுள்ளனர்.கி.மு 500-400 களில், சுஷ்ருதா, சாரகா ஆகிய இந்திய மருத்துவர்கள், இருவகை நீரிழிவு உள்ளதைக் கண்டுபிடித்ததுடன், முதல் வகை இளமையோடும், இரண்டாம் வகை உடல் பருமனோடும் தொடர்புடையது என்றும் பதிவு செய்துள்ளனர்.

டயாபடீஸ் என்ற சொல் முதன்முறையாக கி.மு. 250-ல் கிரேக்கத்தில் பயன்படுத்தப்பட்டுள்ளது. இவ்வளவு நீண்ட வரலாறு இருந்தாலும், இந்த நோய்க்கான காரணத்தை அறிய முடியாமல் மருத்துவ உலகம் தவித்தது. 1889-ல் ஆஸ்கார் மின்கோவ்ஸ்கி, ஜோசப் வோன் மெட்ரிக் ஆகியோர், நலமாக இருந்த ஒரு நாயின் உடலிலிருந்து கணையத்தை அகற்றிய போது, அதற்கு நீரிழிவு உண்டானதைக் கண்டறிந்தனர். 1910-ல் எட்வர்ட் ஆல்பர்ட், நீரிழிவு நோயாளிகள் ஒரு குறிப்பிட்ட வேதிமத்தின் பற்றாக்குறையுடனா இருப்பதை கண்டறிந்து அதற்கு இன்சுலின் என்று பெயர் சூட்டினார்.

1921-ல் ஃப்ரடெரிக் பேண்ட்டிங், சார்லஸ் பெஸ்ட் ஆகியோர் மின்கோவ்ஸ்கியின் சோதனையை தலைகீழாகச் செய்து, அதாவது கணையத்தின் சுரப்பை நாய்க்குச் செலுத்தி நீரிழிவு கட்டுப்படுவதைக் கண்டுபிடித்தனர். இவர்கள் ஜேம்ஸ் காலிப் உதவியுடன் மாடுகளின் கணையத்திலிருந்து சுரக்கும் இன்சுலினை எடுத்து ஆய்வுகள் மேற்கொண்டு வெற்றி பெற்றனர். அதன்பிறகு, மேற்குறிப்பிட்ட அந்த நோயாளி இந்நோயால் எப்படியும் இறந்து விடுவார் என்ற நிலையில் தான் இந்த முயற்சியை மேற்கொண்டு, அவரது உயிரையும் காப்பாற்றினார்.

நீரிழிவுக்கு முதன்முறையாக ஒரு நம்பகமான சிகிச்சை உருவானது. பேண்ட்டிங் பிறந்த நவம்பர் 14 உலக நீரிழிவு நோய் நாளாகக் கடைப்பிடிக்கப்படுகிறது

Thursday, 4 November 2021

ஏன் ? எதற்கு ? எப்படி?

ஏன்?எதற்கு? எப்படி?

கண்கொத்திப் பாம்பு சரியாக கண்களைப் பார்த்துக் கொத்துமாமே? அப்படி ஒரு பாம்பு இருக்கிறதா?

இருக்கிறது.... இல்லை.... எப்படி வேண்டுமானாலும் கூறலாம். செடிகொடி புதர் நிறைந்த பகுதிகளில் வாழும் இந்தப் பாம்பு க்ரீன்விப் ஸ்நேக் (Greenwhip snake) என்று அழைக்கப்படுகிறது. பச்சை சாட்டைப் பாம்பு என்றும் கூறலாம். சாட்டை போலவும் பச்சை நிறத்திலும் இது இருக்கும்.

இதற்குக் கோபம் வந்துவிட்டால், உடலை நீட்டி விரைத்துக் கொள்ளும் (ஒரு ஸ்பிரிங் போல). அப்போது எதிரியை நோக்கி வேகமாகப் பாயும். பளபளப்பான

எந்தப் பொருளைப் பார்த்தாலும் இந்தப் பாம்பு அதைக் குறிவைத்துத் தாக்கும்.

எதிரியிடம் மிகவும் பளபளப்பான பகுதி எது? எல்லா உயிரினங்களுக்கும் கண்கள்தான் எப்போதும் ஈரப்பசையுடன் பளபளவென்று காட்சி தரும். ஆகவே, இந்தப் பாம்பின் குறி அந்தப் பளபளப்பை நோக்கித்தான் இருக்கும். ஆகவேதான் இது பெரும்பாலும் கண்களை நோக்கிப் பாய்ந்து தாக்குகிறது.

மற்றபடி, குறி பார்த்துக் கண்களைத்தான் தாக்க வேண்டும் என்ற சாபமோ குறிக்கோளோ இதுற்குக் கிடையாது. கையிலோ, தலையிலோ உடலிலோ வேறு ஏதாவது பளபளப்பான பொருள் இருந்தாலும் அதையும் நோக்கி இதன் குறி இருக்கத்தான் செய்யும்..

Wednesday, 3 November 2021

ஏன்,எதற்கு,எப்படி?

ஏன் எதற்கு எப்படி?

கேள்வி: தபால் பெட்டிகள் ஏன் பெரும்பாலும் சிவப்பு நிறத் திலேயே அமைக்கப்பட்டுள்ளன?

பதில்: பொதுவாக நமது நாட்டில் தபால் பெட்டிகள் சிவப்பு நிறத்தில் இருப்பதற்குக் காரணம், சுதந்திரத்துக்கு முன்னர் நம்மை ஆண்டு வந்த ஆங்கிலேயர்கள்தான்.

19--ஆம் நூற்றாண்டுக்கு முன்னர் வரை தபால் பெட்டிகள் இங்கிலாந்தில் பச்சை நிறத்தில்தான் இருந்தன. பின்னர் சிவப்பு நிறத்துக்கு மாறின. இதற்குக் காரணம் சிவப்பு நிறம் எளிதில் அனைவரையும் கவனத்தையும் கவர்ந்து விடுவதுதான்.

ஆங்கிலேயர்கள் இந்தியாவை ஆட்சி செய்த காலத்தில்தான் நவீன தபால்துறையும் இந்தியாவுக்கு வந்தது. அவர்கள்தான் தங்களது நாட்டில் உள்ளது போலவே இங்கேயும் தபால்பெட்டிகளுக்கு சிவப்பு நிறம் பூசினர். அவர்கள் ஆதிக்கம் செலுத்திய நாடுகளில் எல்லாம் தபால் பெட்டிகள் சிவப்பு நிறத்தில் அமைக்கப்பட்டன.

ஆனால் இப்போது பல நாடுகளில் சிவப்பு, வெள்ளை, நீலம் ஆகிய நிறங்களில் தபால் பெட்டிகள் காணப்படுகின்றன. அமெரிக்காவில் தபால் பெட்டிகள் நீல நிறத்தில்தான் இருக்கும்.

Thursday, 23 September 2021

இன்றைய தினம்

23-09-1846

(கண்டுபிடிக்கப்பட்டது நெப்டியூன்)

சூரியக் குடும்பத்தின் எட்டாவது கோளான நெப்டியூன் கண்டுபிடிக்கப்பட்டது. கண்டுபிடித்தவர்களாக ஜோகன் காலே, ஊர்பெய்ன் லெ வெர்ரியர், ஜான் கூச் ஆடம்ஸ் ஆகியோர் குறிப்பிடுகின்றனர்.

இக்கோள் தொலைநோக்கி வழியாக இல்லாமல், கணித ரீதியான கணக்கீடுகள் மூலம் கண்டுபிடிக்கப்பட்டது. 1781-ல் கண்டுபிடிக்கப்பட்ட யுரேனஸ் கோலின் சுற்றுப் பாதையில் இருந்த தடுமாற்றங்களுக்கு, அதனருகில் இருக்கும் ஒரு பெரிய வான் பொருளின் ஈர்ப்பு விசை காரணமாக இருக்கலாம், 1843-ல் தான் படிப்பை முடித்த ஆங்கிலேயரான ஜான் கூச் ஆடம்ஸ் கணித்து, 1845-46m காலகட்டத்தில் அப்பகுதியில் வேறொரு கோள் இருப்பதற்கான சாத்தியத்தைக் கண்டறிந்தார். ஆனால், அவர் அனுபவமில்லாத இளையவர் என்பதால், அவரது கணிப்புகளின்படித் தேட கேம்பிரிட்ஜ் வானியல் மையம் முக்கியத்துவம் தரவில்லை.

இதே காலகட்டத்தில், இவருக்கு தொடர்புலாமல் ஊர்பெய்ன் லெ வெர்ரியர் என்ற பிரெஞ்சு வானியலாளர், இதையொத்த கணிப்புகளை வெளியிட்டார். அதன்படி, பெர்லின் ஆய்வு மையத்தில் ஜோகன் காலே என்ற ஜெர்மானியர் 1843- செப்டம்பர் 23 இரவு நெப்டியூன் கோலை கண்டுபிடித்தார். வேடிக்கை என்பது, கேம்பிரிட்ஜ் வானியல் ஆய்வு மையத்தின் இயக்குனர் ஜெம்ஸ் சால்லிஸ், ஆடம்சின் கணிப்புகளின்படித் தேடியபோது, ஆகஸ்ட் 4, 12 ஆகிய தேதிகளில் இருமுறை இக்கோலை காண நேர்ந்தாலும், இது புதிய கோல் என்ற அவரால் உணர முடியவில்லை. இவற்றுக்கெல்லாம் முன்னால், 1612 டிசம்பர் 28,1613 ஜனவரி 27 ஆகிய தேதிகளில் கலிலியோ இந்த இடத்தில் ஒரு பொருளைக் கண்டதைப் பதிவு செய்துள்ளார். ஆனால், அவரது சிறிய தொலைநோக்கியால், இது ஒரு கோல் என்று உணர முடியாததால், இதை ஒரு நட்சத்திரம் என்று அவர் குறிப்பிட்டிருந்தார். நீல நிறக் கோளான இதற்கு நெப்ட்யூன் என்ற ரோமானிய கடற் கடவுளின் பெயர் சூட்டப்பட்டது.

** "**************************

(மனதின் ஆழத்தை அளந்தவர்)

----------------------------------------- "பனிப்பாறை போன்றது மனம், ஏழில் ஒரு பங்கு மட்டுமே தண்ணீருக்கு மேலே மிதக்கும் "எனும் சுவராசியமான ஒப்புமையால் மனதின் ஆழத்தை விளக்கியவர் சிக்மண்ட் பிராய்ட். ஆஸ்திரியாவைச் சார்ந்த நரம்பியல் நிபுணரான இவர் தான் முதல்முதலில் மனிதர்களின் பல்வேறு செயல்பாடுகளுக்கு முக்கிய காரணம் மனம்தான் என்று அறிவியல்பூர்வமாக நிரூபித்தார்.

இயல்பாக இருக்கும் ஒருவர் திடீரென விசித்திரமாக நடந்து கொள்ளக் காரணம் பேய், பிசாசு போன்ற அமானுஷ்யச் சக்திகள் அல்ல; ஆழ்மனதில் ஏற்படும் பாதிப்புகளே என விளக்கினார். "இட்", "ஈகோ", "சூப்பர் ஈகோ" எனும் மூன்று அடுக்குகள் உள்ளன. மற்ற உடல் உறுப்புகள் போல இவற்றுக்கு உருவம் இல்லை. ஆனால், இவைதான் நம்மைத் தொடர்ந்து வழிநடத்துகின்றன என்றார்.

விழிப்பு நிலை போலவே தூக்கத்திலும் மனம் மிக உற்சாகமாக செயல்படும். அப்போது ஆழ்மனதில் அடக்கி வைத்திருந்த விஷயங்களைக் கிளறி எடுக்கும். அப்படிப்பட்ட உள் மனதின் வெளிப்பாடுகளே கனவு என "கனவுகளின் விளக்கம் "என்ற புத்தகத்தில் எடுத்துரைத்தார். நவீன மனநல மருத்துவத்தின் தந்தை என்று போற்றப்படும் சிக்மண்ட் பிராய்ட் தனது 83-வது வயதில் 1939 செப்டம்பர் 23-ல் மரணமடைந்தார்.

Saturday, 18 September 2021

இன்றைய தினம்

எளிமையான அகராதியை உருவாக்கிய ஆங்கில எழுத்தாளர் சாமுவேல் ஜான்சன் (Samuel Johnson) பிறந்த தினம் - செப்டம்பர் 18:

இங்கிலாந்தின் ஸ்டாபோர்டுஷயர் கவுன்ட்டிக்கு உட்பட்ட லிச்ஃபீல்டு நகரில் (1709) பிறந்தார். தந்தை புத்தக வியாபாரி. 3 வயதில் வீட்டில் அம்மாவிடம் பாடம் கற்றார். பிறகு, உள்ளூர் பள்ளியில் கல்வியைத் தொடங்கினார்.

சிறந்த மாணவராகத் திகழ்ந்தார். அப்பாவின் கடைக்குச் சென்று புத்தகம் பைண்டிங் செய்ய உதவுவார். கூடவே, அங்குள்ள நூல்களைப் படித்து அறிவை விசாலப்படுத்திக் கொண்டார். கவிதைகளும்விதைகளும் எழுத ஆரம்பித்தார்.

லத்தீன் மொழியில் சிறந்து விளங்கிய இவரிடம், ஆங்கிலக் கவிஞர் அலெக்சாண்டர் போப்பின் ‘மெஸையா’ நூலை மொழிபெயர்க்குமாறு கூறினார் ஆசிரியர். பகலில் பாதியும் மீதியை அடுத்த நாள் காலையிலும் எழுதி முடித்துவிட்டாராம்.

பெரும்பாலான நேரத்தை எழுதுவதிலும் வாசிப்பதிலும் செலவிட்டார். ஆக்ஸ்ஃபோர்டு பெம்ப்ரோக் கல்லூரியில் சேர்ந்தவர், வறுமையால் படிப்பை பாதியிலேயே நிறுத்தினார். சிறிது காலம் ஆசிரியராகப் பணியாற்றினார். ‘தி ஜென்டில்மேன்ஸ்’ இதழில் அரசியல், பொருளாதாரம், சமூகம், இலக்கியம் குறித்த கட்டுரைகள், கதைகள் எழுதத் தொடங்கினார்.

ஆங்கிலத்தில் பல அகராதிகள் இருந்தாலும் ஆழமான, எளிமையான அகராதி இல்லை என்ற குறை இருந்தது. ஒரு நல்ல ஆங்கில அகராதி உருவாக்க வேண்டும் என்று இவரிடம் சில பதிப்பாளர்கள் கேட்டனர். ஒப்புக்கொண்ட இவர் உடனே அதற்கான வேலையில் இறங்கினார்.

அது சற்று சவாலாகத்தான் இருந்தது. வறுமையுடன் போராடிக்கொண்டே இப்பணியில் ஈடுபட்டார். தொடர்ந்து கதை, கட்டுரைகளும் எழுதிவந்தார். 5 பவுண்ட் கடனை திருப்பிச் செலுத்தாததால் சிறை செல்லவேண்டிய நிலை ஏற்பட்டது. இவரது உடல்நலம் பாதிக்கப்பட்டது. மனைவியும் இறந்தார்.

இதையெல்லாம் மீறி அகராதி பணியை விடாமல் மேற்கொண்டார். 8 ஆண்டுகளாக தனி நபராக நின்று, கடுமையாக உழைத்து ஆங்கில அகராதியை எழுதி முடித்தார். 1755-ல் 2 தொகுதிகளாக வந்தது. இது இவருக்கு உலகம் முழுவதும் புகழைப் பெற்றுத் தந்தது.

ஆக்ஸ்ஃபோர்டு பல்கலைக்கழகம் இவருக்கு எம்.ஏ. பட்டமும் பின்னர் டாக்டர் பட்டமும் வழங்கியது. ட்ரினிட்டி கல்லூரி டாக்டர் பட்டம் வழங்கியது. பல பிரபல இதழ்களில் இவரது படைப்புகள் வெளிவந்தன. இலக்கிய விமர்சனக் கட்டுரைகளும் எழுதினார். இவரது பல நூல்கள் பிரெஞ்ச், டச்சு, ஜெர்மன், இத்தாலி, ரஷ்ய மொழிகளில் மொழிபெயர்க்கப்பட்டன.

கவிதையை அலங்கார வார்த்தைகளுடன் எழுதுவதைவிட, எல்லோரும் புரிந்துகொள்ளும்படி எழுதுவதே முக்கியம் என்று வலியுறுத்தினார். பொருளாதார ரீதியான போராட்டம் இருந்தபோதிலும் தன்னைவிட ஏழ்மை நிலையில் இருந்த நண்பர்களை ஆதரித்து வந்தார். இவரைப் பற்றி நண்பர் பாஸ்வெல் எழுதிய ‘லைஃப் ஆஃப் ஜான்சன்’ வாழ்க்கை வரலாற்று நூல் பெரும் வரவேற்பை பெற்றது.

இவருக்குப் பின்னர் எளிய வடிவில் பல அகராதிகள் வந்தாலும் இவருடையதுதான் முன்னோடி அகராதியாக கருதப்படுகிறது. கவிஞர், கட்டுரை ஆசிரியர், இலக்கிய விமர்சகர், வாழ்க்கை வரலாறு எழுத்தாளர், ஆசிரியர் என பன்முகப் பரிமாணம் கொண்ட சாமுவேல் ஜான்சன் 75-வது வயதில் (1784) மறைந்தார்.

இன்றைய தினம்

உலக மூங்கில் தினம் - செப்டம்பர் 18:

ஒவ்வொரு வருடமும் செப்டம்பர் மாதம் 18 தேதி கொண்டாடப்படுகிறது.

உற்பத்தியில் சீனா முதலிடத்திலும், இந்தியா இரண்டாவது இடத்திலும் உள்ளன. ஆனால் உலக வர்த்தக அளவான $ 10 பில்லியன் தொகையில் சீனா சுமார் 50% பங்கை பெற்று முன்னணியிலுள்ளது.

2020 ஆண்டுகளில் இதன் அளவு $26 பில்லியனாக உயரும் எனவும், தற்போதைய உள்ளூர் வர்த்தகம் ரூ.6505 கோடி எனவும் அது 2019 ஆண்டில் ரூ.36,000 கோடியாக வளர வாய்ப்புள்ளதாகவும் இந்திய விவசாயத்துறை அமைச்சகம் கூறுகிறது.

மூங்கிலை பச்சைத் தங்கம், ஏழைகளின் மரம், வனவாசிகளின் வாழ்வதாரம், மற்ற மரங்களைக் காட்டிலும் அதிக கரிமில வாயுவை எடுத்துக் கொண்டு அதிக பிராணவாயுவை வெளியேற்றும் என்கிறோம்.

ஆனால் மூங்கில் வளர்ப்பில் எந்த அளவிற்கு முன்னேறியிருக்கிறோம் ?

தமிழ் நாட்டில் சாதாரணமாக காணும் காட்சி.

வருத்தம் தரும் அளவிற்குத்தான் உள்ளது. உபயோகம் சுமார் 1500க்கு மேலிருந்தாலும் தமிழகத்தில் மூங்கில் வளர்ப்பை ஏனோ மக்கள் விரும்புவதில்லை. இன்னும் கூடை, ஏணி, தடுப்பு போன்ற சாதாரண நிலையிலேயே மூங்கில் உபயோகம் உள்ளது.

மற்ற மாநிலங்களில் நிலைமை மேம்பட்டுள்ளது. நாற்காலி, மேசை, ஒட்டுப் பலகை. ஜன்னல் மறைப்புகள் என முன்னேற்றம் உள்ளது.

வடகிழக்கு மாநிலங்களில் சுயுதவிகுழுக்கள் செய்யும் பொருட்கள்

வடகிழக்கு மாநிலங்களில் பள்ளிக்கூடங்களை மூங்கிலைக் கொண்டு கட்டுகின்றனர் என்பது மகழ்ச்சி தரும் செய்தி.

வடகிழக்கு மாநிலங்களில் மூங்கிலால் உருவாக்கப்பட்ட பள்ளிகள்

உலக அளவில் தரை, சுவற்றிற்கான ஒட்டுப் பலகை, கூரை கூட மூங்கிலில் செய்கின்றனர் என்பது வியப்பிற்கான ஒரு செய்தியாகும்.

ஐரோப்பாவின் முக்கிய விமான நிலையங்களில் ஒன்றான ஸ்பெயின் நாட்டின் “மார்டிரிட்” நகர விமான நிலைய T 4 பயணிகள் பகுதியின் கூரையை மூங்கிலால் செய்துள்ளனர்.

இயற்கை இந்தியாவிற்கு கொடுத்த கொடை “மூங்கில்”. எப்படி முன்னெடுத்துச் செல்லப் போகிறோம் ?? மத்திய அரசாங்கம் “தேசீய மூங்கில் இயக்கம்” (National Bamboo Mission) என்ற இயக்கத்தின் மூலம் பிரபலப்படுத்துகிறது வாய்ப்பைப் பயன்படுத்திக் கொள்வது நம் கையில்தான் உள்ளது.

Friday, 17 September 2021

இன்றைய தினம்

பெரியார் பிறந்த தினம் - செப்டம்பர் 17:

தந்தை பெரியார் - வஞ்சிக்கப்பட்ட மக்களின் வாய்தா வாங்காத வக்கீல். ஆயிரமாண்டு ஆதிக்க மலையை அடித்து நொறுக்கியது அவரது கைத்தடி. அடங்கியிருந்தவர்கள் எழுந்து நிற்க ஊன்றுகோலாக இருந்ததும் அதுவே. 95 வயதிலும் மூத்திரச் சட்டியைத் தூக்கிக்கொண்டு சளைக்காமல் போராடியவரின் சரித்திரத்தில் இருந்து...

* ராமசாமி என்பது அவரது பெற்றோர் வைத்த பெயர்.பெண்ணடிமைத்தனம் குறித்துப் பெரும் பிரசாரம் செய்ததற்காக, மாநாடு கூட்டிய பெண்கள் அமைப்பினர் சூட்டிய பட்டம்தான் பெரியார். அதுவே அவரது பெயராக மாறிப் போனது!

* பெரியார் - நாகம்மை இருவருக்கும் ஒரு பெண் குழந்தை பிறந்து 5-வது மாதமே இறந்து போனது. அதன்பிறகு குழந்தைகள் இல்லை. ஆனால் 20-க்கும் மேற்பட்ட அநாதைக் குழந்தைகளைத் தத்தெடுத்து வளர்க்க ஆரம்பித்தார். படிக்கவைத்துத் திருமணம் செய்தது வரை இவரது செலவுதான். இவர்களுக்கு ஈ.வெ.ரா.ம. என்பது இனிஷியல்!

* தமிழ்நாட்டுச் சரித்திரத்தில் எடைக்கு எடை பொருட்கள் தரப்பட்டது இவருக்குத்தான். வெள்ளி, நெல் மூட்டைகள், பேரீச்சம்பழம், பெட்ஷீட் தொடங்கி வெங்காயம் வரை தரப்பட்டுள்ளது!

* தான் மேடையில் பேசிக்கொண்டு இருக்கும்போது யாராவது மாற்றுக் கருத்து இருந்தால் உடனே எழுந்து சொல்லலாம் என அறிவித்திருந்தார். ''நான் இல்லாத இடத்தில் என்னைப்பற்றிப் பேசாதே, காணாத இடத்தில் குரைக்காதே'' என்பார்!

* வால்மீகி ராமாயணம், அபிதான சிந்தாமணி, தமிழ்ப் பேரகராதி ஆகிய மூன்று புத்தகங்களையும் எப்போதும் தன்னுடன் வைத்திருப்பார். சர்ச்சைக்குரிய புத்தகங்களின் அடுத்தடுத்த பதிப்புகளையும் விடாமல் வாங்குவார்!

* பதினைந்துக்கும் மேற்பட்ட நாய்களை வளர்த்தார். பிரெஞ்சு தொடங்கி ராஜபாளையம் வரை பல வகைகள் இருக்கும். வெளியூர் பயணத்தின்போதும் அவை வேனில் ஏறி வந்து மேடைக்குக் கீழே உட்கார்ந்திருக்கும்!

* தான் செய்யும் சிறு செலவுக்குக்கூட கணக்கு வழக்கு வைத்திருந்தார். அதைச் சின்ன டைரியில் குறித்துவைத்திருந்தார். வருமானவரி பிரச்னை ஒன்று வந்தபோது, இந்த டைரிகளைப் பார்த்து நீதிபதிகளே ஆச்சர்யப்பட்டார்கள்!

* வாரம் ஒருமுறை, பத்து நாளைக்கு ஒருமுறைதான் குளிப்பார். ''குளிக்கணும்கிற ஞாபகமே எனக்கு வர்றதில்ல. அதை ஒரு தொந்தரவாக நினைக்கிறேன்'' என்பார்!

* தமிழில் எழுத்துச் சீர்திருத்தம் கொண்டுவந்தவர் பெரியார்தான். ணா, லை என்றெல்லாம் 75 ஆண்டுகளுக்கு முன்னால் முதன்முதலாக எழுத ஆரம்பித்தவர் அவர்தான்!

* இளமைக் காலத்தில் தான் செய்த சேஷ்டைகளைப் பகிரங்கமாகச் சொன்னவர். ''மைனர் வாழ்க்கை நடத்தியவன்தான். ஆனால், இதுநாள் வரை மது அருந்தியதே இல்லை. ஆனால், பலருக்கும் வாங்கிக்

கொடுத்திருக்கிறேன். நான் வியாபாரியாக இருந்தபோது பொய் பேசி இருப்பேன். பொதுவாழ்க்கைக்கு வந்தபிறகு ஒரு பொய்கூடச் சொன்னதில்லை. ஒழுக்கக் கேடான காரியத்தையும் செய்ததில்லை'' என்று அறிவித்தவர்!

* உங்களுடைய அரசியல் வாரிசு யார் என்று கேட்டபோது, ''எனக்கு அரசியல் வாரிசு என்று யாரும் கிடையாது. என்னுடைய கொள்கைகளும் கருத்தும்தான் வாரிசு'' என்றார்!

* தன்னுடைய மனைவி நாகம்மை, அம்மா சின்னத் தாய் ஆகியோர் இறந்தபோது, தனக்கு மகிழ்ச்சியாக இருக்கிறது என்று பகிரங்கமாக அறிவித்தார். 'எனக்குஇருந்த குடும்பத் தொல்லைகள் ஒழிந்தன' என்று காரணம் சொன்னார்!

* இன்றைக்குப் பிரபலமாக இருக்கும் செல்போன், கம்ப்யூட்டர், வாக்மேன், வெப்கேமரா, டெஸ்ட்டியூப் பேபி, உணவு கேப்சூல்கள், குடும்பக் கட்டுப்பாடு... அனைத்தைப் பற்றியும் 65 ஆண்டுகளுக்கு முன்னால் 'இனிவரும் உலகம்' என்ற கட்டுரையில் எழுதி தன்னுடைய விஞ்ஞான அறிவை வெளிப்படுத் தியவர் பெரியார்!

* இரண்டு கவர்னர் ஜெனரல்கள் நேரில் வந்து சந்தித்து 1940, 42 ஆண்டுகளின் சென்னை மாகாணத்தின் ஆட்சிப் பொறுப்பை ஏற்றுக்கொள்ளச் சொன்னபோது மறுத்தார். ''நெருப்புகூடக் குளிர்ச்சி ஆகலாம், வேப்பெண்ணெய் தேன்ஆகலாம். ஆனால், பதவியேற்றவன் யோக்கியனாக இருக்கவே முடியாது'' என்றார்!

* தனது மனதில் பட்டதைத் தயவு தாட்சண்யம் பார்க்காமல் சொல்லிவிடுவார். வெற்றிலை பாக்கு கடை வியாபாரிகள் சங்க ஆண்டு விழாவுக்கு பேசப் போனவர், ''உங்களால் இந்த நாட்டுக்கு எந்த நன்மையும் இல்லை, எனவே, கடைகளைக் மூடி விட்டு, மக்களுக்குப் பயன்படக்கூடிய வேலையைப் பாருங்கள்'' என்று சொல்லி விட்டு வந்தார்!

* தன்னுடைய குடும்பச் சொத்தை எடுத்து வந்து பொதுவாழ்க்கையில் செலவு செய்தார். பொதுவாழ்க்கையில் கிடைத் ததை அனைவருக்கும் பயன்படுவது மாதிரி டிரஸ்ட் ஆக்கினார். அவரதுசேகரிப் பில் நயாபைசாகூடத் தனது குடும்பத்தினர் யாருக்கும் தரப்படவில்லை!

* முக்கியமானவர்கள் யார் வந்தாலும் தள்ளாத வயதிலும் எழுந்து நிற்பார். இளைஞராக இருந்தாலும் 'வாங்க, போங்க' என்பார். பொது நிகழ்ச்சியில் கடவுள் வாழ்த்து பாடினாலும் எழுந்து நிற்பார். யாராவது திருநீறு கொடுத்தாலும் வாங்கிக்கொள்வார்!

* உலகம் முழுவதும் பெண்ணியவாதிகள் தங்களது வேதப்புத்தகமாகச் சொல்லும் 'செகண்ட் செக்ஸ்' வெளிவருவதற்கு இருபது ஆண்டுகளுக்கு முன்பே இவர் எழுதிய 'பெண் ஏன் அடிமையானாள்?' புத்தகம் வெளியாகிவிட்டது!

* 'நான் சொன்னதை அப்படியே நம்பாதீர்கள். உங்களுக்குச் சரி என்றுபட்டால் ஏற்றுக்கொள்ளுங்கள். நான் கொள்கையை மாற்றிக்கொண்டே இருப்பேன். எப்போது மாறுவேன் என்று எனக்கே தெரியாது'' என்று எல்லாக் கூட்டத்திலும் மறக்காமல் சொல்வார்!

* அவருடைய நண்பர்களில் எட்டுப் பேர் 42 வயதில் இறந்துவிட்டார்களாம். தானும் 42 வயதில் இறந்து போவோம் என்று நினைத்தாராம். ஆனால், அதன்பிறகுதான் தீவிரப் பொது வாழ்க்கையில் இறங்கினார்!

* 'தோழர்' என்று கூப்பிடுங்கள் என்று முதன் முதலாக தமிழ்நாட்டில் அறிவித்தவர் இவர்தான்!

* புத்துலக தீர்க்கதரிசி, தென்கிழக்கு ஆசியாவின் சாக்ரடீஸ் என்று யுனெஸ்கோ நிறுவனம் பாராட்டுப் பத்திரம் கொடுத்தபோது, ''இந்த வார்த்தைகளை ஏற்றுக் கொள்ள வெட்கப்படுகிறேன்'' என்றார்!

* பெரியார் அதிகமாக உச்சரித்த வார்த்தை-வெங்காயம். ''வெங்காயத்தை உரித்துக்கொண்டே போனால் கடைசியில் எதுவுமே மிஞ்சாது. ஒன்றும் இல்லாத பூஜ்யப் பேர்வழிகளைத் தாக்கவே அந்த வார்த்தையைப் பயன்படுத்துகிறேன்'' என்றார்!

* நேரடி விவாதங்களின்போது, ''சொல்றதுக்காக என்னை மன்னிக்கணும்'' என்று சொல்லிவிட்டுத்தான் பதில் சொல்வார்!

* 95 வயது வயதில் மொத்தம் 98 நாட்கள் வாழ்ந்தார். அதில் 35 நாட்கள் வெளியூர் பயணம் சென்று 42 கூட்டம் பேசினார். கடைசியாக அவர் பேசிய இடம் சென்னை தியாகராயர் நகர். அந்த இடத்தில்தான் பெரியார் சிலை கம்பீரமாக நிற்கிறது!

Thursday, 16 September 2021

இன்றைய தினம்

“ உலக ஓசோன் தினம் “ – செப் -16

ஓசோன் மண்டலம் என்பது வளி மண்டலத்தில் உள்ள { ஓசோன் – (13) } ஒரு வகை –

காற்றுப் படலம்தான். சூரியனில் இருந்து உமிழப்படும் ஆபத்தான புற ஊதாக்கதிர்களை பூமியில்

விழாமல் தடுப்பது ஓசோன் அடுக்குதான்.

93-முதல் 99 % புற ஊதாக்கதிர்களை ஓசோன் படலம் கிரகித்து விடுவதால்தான் நம்மால் இங்கு நிம்மதியாக வாழ முடிகிறது. இந்தப் படலத்தில் துளை

விழுந்திருப்பதால்தான் சமீபகாலமாக வெப்பம் அதிகரித்துள்ளது. காற்று மாசு படாமல் தடுப்பதின்

மூலம் ஓசோன் படலம் சேதமைடயாமல் பார்த்துக்கொள்ளலாம்.

ஒசோன் படலம் தரையில் இருந்து 10 கி.மீ. முதல் 50 கி.மீ. வரையுள்ள காற்று மண்டலத்தில்

காணப்படுகிறது. பிரஞ்சு இயற்பியல் வல்லுனர்கள் சார்லஸ் பேப்ரி, ஹென்றி புய்சன் ஆகியோர்

(1913-இல்) ஓசோன் படலத்தைக் கண்டுபிடித்தனர். ‘சிட்னி சேப்மேன்’ என்ற இங்கிலாந்து விஞ்ஞானி

(1930-இல்)இரு அணுநிலை ஆக்சிஜனும், ஒரு முழு ஆக்சிஜனும் இணைந்ததே ஓசோன்(03) என்று

கண்டுபிடித்தார். சூரிய ஒளியில் உள்ள புற ஊதாக்கதிர் தாகுவதால் ஆக்சிஜன் அணுக்களில் ஏற்படும்

மாற்றமே ஓசோனை தோற்றுவிக்கிறது என்றார்.

மற்றொரு இங்கிலாந்து ஆய்வாளர் டோப்சன்,

ஒசோனின் அடர்த்தியை அளவிடும் ‘ஸ்பெக்ட்ரோபோட்டோ’ மீட்டரை ( டோப்சான் மீட்டர் )

உருவாக்கினார்.

ஓசோன் மூலகூறும் நிலையற்றதுதான். புற ஊதாக்கதிரின் தாக்குதலால் உருவாகும் –

ஒசோன் அணுக்கள் மீண்டும் அந்த கதிர்கள் தாக்கும்போது அணுநிலை ஆக்சிஜனாகவும்,

ஆக்சிஜனாகவும் பிரிக்கிறது. இது ஓசோன்-ஆக்சிஜன் சுழற்சி எனப்படுகிறது. ஸ்ட்ரேடோஸ்பியர்

( 50கி.மீ.உயரத்திற்குள்) அடுக்கில் உருவாகும் ஓசோன் படலம் மட்டுமே இந்த சுழற்சிக்கு தப்பி நிலைக்கிறது.

அதற்கு மேலுள்ள ஒசோன் அணுக்கள் இந்த சுழற்சியால் சிதைந்து விடுவதும்,

மீண்டும் உருவாவதுமாக இருக்கிறது. ஸ்ட்ரேடோஸ்பியா அடுக்கில் மட்டும் 90 % ஓசோன் படலம்

இருக்கிறது.

உயிரினங்களின் வாழ்க்கைக்கு இன்றியமையாதது, ஏனெனில் செறிவு குறைந்த ஓசோன்

தீங்கு விளைவிக்கும் புறஊதாக் கதிர்களை மிகுதியாக உட்கிரகிக்கிறது. புறஊதாக் கதிர்கள் ( U.V. )

அதன் அலை நீளத்தைச் சார்ந்த யு.வி. ஏ.பி.சி என மூன்று வகைகளாகப் பிரிக்கப்படுகிறது. அலைநீளம்

கொண்டது UVA ( 400315 நா,மீ ) – UVB 9 315280 நா.மீ ) மற்றும் UVC ( 280 – 100 நா.மீ.) அலை நீளம் கொண்டது.

சி.புறஊதாக்கதிர்கள் ( UVC ) மனிதர்களுக்கு மிகவும் தீங்கிழைக்கக் கூடியது.

UVB கதிர்களால் தோல் புற்று நோய் ஏற்படலாம். UVA கதிர் பரபு சார்ந்த பாதிப்புகளை உருவாக்கும்

ஆற்றலுடையது.

அண்டார்டிக்கில் ஒசோன் ஒட்டை இருப்பது அமெரிக்காவில் 1985-ஆம் ஆண்டில் கண்டறியப்-

பட்டது. 1978-ஆம் ஆண்டில் அமெரிக்கா, கனடா மற்றும் நார்வே போன்ற நாடுகள் குளோரோ –

புளோரோ கார்பன் உள்ள பல பொருட்களை பயன்படுத்த தடை விதித்தன. குளிர்பதனம் மற்றும்

தொழிலாகத் தூய்மை பணிகளில் கடும் கட்டுபாடுகள் விதிக்கப்பட்டன. ‘ த மோண்ட் ரியல் புரோடோ

க்கால்’ என்ற சர்வதேச உடன்பாட்டின்படி 1987 முதல் CFC உற்பத்தி கடுமையாகக் குறைக்கப்பட்டு

1996-ஆம் ஆண்டு பெருமளவு நிறுத்தப்பட்டது. இதையடுத்து ஓசோன் ஒட்டை பெரிதாவது –

தடுக்கப்பட்டுள்ளது.

ஓசோன் படல ஓட்டை 97 லட்ச சதுர மைல் என்ற கனக்கிலிருந்து தற்போது ( சுமார் 6

ஆண்டுகட்கு முன்பு ) அது 5-வது ஓட்டையாக அண்டார்டிக் பகுதிக்கு மேல் 1 கோடியே 15 லட்ச

சதுர மைல்கள் இருப்பதாக அறியப்படுகிறது.

ஐ.நா.சபையில் உள்ள 24 நாடுகள் ஒன்ரு கூடி ( 1987-இல்) செப்டம்பர்-16-ஆம் நாளை

ஓசோன் பாதுகாப்பு தினமாக அனுசரிக்க வேண்டும் என்ற வேண்டுகோளை 1995-இல் வெளியிடப்

பட்டது. நம் பங்குக்கு இனி என்ன செய்யப்போகிறோம் ?.

Thursday, 9 September 2021

இன்றைய தினம்

செப்டம்பர் பகுதி 9

குழந்தைகளுக்கு மிகவும் பிடித்தவை பொம்மைகள். அதுவும் புசுபுசுவென இருக்கும் "டெடி பியர்" பொம்மையை விரும்பாத குழந்தைகளே இல்லை. உணவூட்டுவது, மருத்துவம் பார்ப்பது, தூங்கவைப்பது என டெடி பியர்களுடன் விளையாடும் மழழைகள் ஏராளம். டெடி பியரை விரும்பும் பெரியவர்களும் நிறைய இருக்கிறார்கள்.

இன்று செப்டம்பர் 9 அமெரிக்காவில் தேசிய டெடி பியர் தினம். டெடி பியர் பொம்மையின் வயது 100 ஆண்டுகளை கடந்துவிட்டது.

நீண்ட காலமாக கதைகளில் இடம்பெற்ற கரடிகள், பொம்மை வடிவம் பெற்றது 19-ம் நூற்றாண்டில் தான். ஜெர்மனியைச் சேர்ந்த மார்கரெட் ஸ்டெயிப் எனும் பொம்மை வடிவமைப்பாளர் 1899-ல், 23 விதமான பொம்மைகளுக்கு வடிவமைப்பு செய்யப்பட்டு காப்புரிமை பெற்றுள்ளார்.அதில் நடனமாடும் கரடி மற்றும் கரடி மற்றொரு சிறிய கரடியை கையில் வைத்திருக்கும் பொம்மை போன்ற பொம்மைகள் அடக்கம்.

நியூயார்க்கில் உள்ள புரூக்ளின் என்ற இடத்தில் மோரிஸ் மிக்டாம் என்பவர் தனது பொம்மை கடையில் முதல் டெடி பியர் கரடி பொம்மையை விற்பனைக்கு வைத்திருந்தது வரலாற்றில் பதிவாகி உள்ளது.1902-ல அவர் கரடி பொம்மையை விற்பனை செய்ய தொடங்கி உள்ளார்.

ஜெர்மனியில் இருந்து 1903-ல் ஸ்டெயிப் கம்பெனியில் தயாரிக்கப்பட்ட 3 ஆயிரம் கரடி பொம்மைகள் ஏற்றுமதி செய்யப்பட்டு அமெரிக்கா முழுவதும் விற்பனைக்கு வந்து இறங்கின.

அப்போது கரடி பொம்மைகள் "புருயின்ஸ் "என அழைக்கப்பட்டது. அப்போதைய பருவ இதழ்களிலும் கரடி பொம்மைகள் இந்த பெயரிலேயே விளம்பரங்கள் செய்யப்பட்டது.

1906-ம் ஆண்டு நவம்பர் மாதம் அமெரிக்கா பொம்மை தயாரிப்பாளரான இ.ஜே.ஹார்ஸ்மேன் என்பவர் தான் தயாரித்த கரடி பொம்மைகளுக்கு "டெடி பியர்" எனும் பெயர் சூட்டி விளம்பரங்கள் செய்தார். " ஆலிஸ் கார்ட்" என்பவர் எழுதிய மாயாஜால கதைகளில் டெடி பியர் என்ற வார்த்தை பயன்படுத்தப் பட்டிருந்தது.அதை மையமாக வைத்து அவர் தனது பொம்மைக்கு இந்த பெயர் சூட்டினார்.

1909-ல் டெடி பியர் பொம்மை கார்ட்டூன் வடிவம் பெற்றது. அமெரிக்காவில் "லிட்டில் ஜானி அண்ட் த டெடி பியர் " என்ற கார்ட்டூன் காவியம் வெளிவந்தது.

டைட்டானிக் கப்பல் 1912-ல் கடலில் மூழ்கிய போது ஸ்டெயிப் பொம்மை நிறுவனம் கருப்பு நிறத்தில் டெடி பியர் பொம்மையை வெளியிட்டு துக்கம் அனுசரித்தது.

லண்டன் நாளிதழில் கரடி பொம்மை பற்றிய காமிக் கதைகள் இடம் பெற தொடங்கியதால் இங்கிலாந்தில் டெடி பியர் விற்பனை சூடுபிடிக்க ஆரம்பித்தது.

வால்ட் டிஸ்னி முதன் முதலில் 1924-ல் வண்ண அனிமேஷன் படத்தை உருவாக்கினார். அதில் கதாநாயகர்களே டெடி பியர் கள்தான். " ஆலிஸ் அண்ட் தி திரீ பியர்ஸ்" என்ற கரடி அனிமேஷன் படம் தான் அந்த முதல் அனிமேஷன் படம்.

கரடி பொம்மைகளில் மிகவும் புகழ்பெற்றது "வின்னி த பூ" பொம்மை தான்.இது 1926-ம் ஆண்டு ஏ.ஏ.மில்னி கதையில் இந்த கரடி பொம்மை உருவம் வெளியாகி இருந்தது.

1944-ல் அமெரிக்காவில் காட்டுத்தீ விழிப்புணர்வு இயக்கத்துக்காக "ஸ்மோக்கி பியர்" எனும் கரடி பொம்மையை உருவாக்கி விளம்பரங்கள் செய்யப்பட்டது.

1953-ல் ஸ்டெயிப் உருவாக்கிய கரடி பொம்மையின் 50 ஆண்டு விழா ( கோல்டன் ஜூப்லி) கொண்டாடப்பட்டது. அப்போது "ஜேக்கி பேபி" என்ற பெயரில் கரடிக்குட்டி என்ற புதிய வகை கரடி கதாபாத்திரம் உருவாக்கப்பட்டது.

வென்டி பாஸ்டன் என்பவர் 1954-ல் முதன் முதலாக துவைத்து சுத்தமாக்கி பயன்படுத்தும் கரடி பொம்மையை உருவாக்கி அசத்தினார்.

1958-ல் மற்றொரு புகழ்பெற்ற கரடி பொம்மை வகையான "பட்டிங்டன் பொம்மை" அறிமுகம் செய்யப்பட்டது. மைக்கேல் மாண்ட் எழுதிய கதைகளில் இடம்பெற்ற இந்த கதாபாத்திரம் பொம்மையாக உருப்பெற்றது.

வால்ட் டிஸ்னி,1959-ல் "வின்னி த பூ பொம்மையை" முக்கிய மாற்றங்கள் செய்ததுடன் அதைப் பயன்படுத்த சில விதிமுறைகள் வகுத்தார்.

கலோனியல் பாப் கெண்டர்சன்1962-ல் "டெடி பியர் கிளப்" ஒன்றை தொடங்கினார்.

" வின்னி த பூ" கதாபாத்திரம் 1975-ல் சினிமா திரைப்படமாக வெளிவந்து வரலாறு படைத்தது.

லண்டனில் 1985-ல் டெடி பியர் ஏல மையம் கிறிஸ்டி என்பவரால் தொடங்கப்பட்டது. இங்கு டெடி பியர் பொம்மைகள் மட்டுமே ஏலம் விடப்பட்டது குறிப்பிடதக்கது.

இங்கிலாந்தில் மைக்கேல் பிரான்ரெத்,1988-ல் டெடி பியர் அருங்காட்சியகம் தொடங்கினார்.

1989-ல் லண்டனில் முதல் டெடி பியர் திருவிழா கொண்டாடப்பட்டது. அதே ஆண்டில் 1926-க்கு முன்பு தயாரிக்கப்பட்ட "ஸ்டெயிப்" பழைய கரடி பொம்மைகளுக்கான நினைவு திருவிழாவும் நடத்தப்பட்டது.அப்போது பழமையான ஒரு பொம்மை 55 ஆயிரம் பவுண்டுகள் தொகைக்கு ஏலம் போனது.பால் வோல்ப் என்ற அமெரிக்கர், தனது 42-வது திருமண நாளுக்காக இந்த பொம்மையை ஏலத்தில் எடுத்து மனைவி ரோஸ்மேரிக்கு பரிசளித்தார்.

1994-ல் இங்கிலாந்தில் ஏலம் விடப்பட்ட டெடி பியர் பொம்மை உலக பிரசித்தி பெற்றது.1904-ல் தயாரிக்கப்பட்ட மிகப்பழமையான ஸ்டெயிப் கரடி பொம்மையை ஜப்பானைச் சார்ந்த யோகினோ செகிகுசி என்பவர் ஒரு லட்சத்து பத்தாயிரம் பவுண்டுகள் ஏலம் எடுத்தார். ஜப்பானில் தான் தொடங்கிய அருங்காட்சியகத்தை பிரபலப்படுத்த இதை ஏலத்தில் எடுத்தார்.

Sunday, 29 August 2021

இன்றைய தினம்

மைக்கேல் பாரடே மின்காந்த தூண்டலை கண்டுபிடித்த தினம் - ஆகஸ்டு 29, 1831:

மைக்கேல் பரடே பிரிட்டனை சேர்ந்த ஒரு வேதியியலாளரும், இயற்பியலாளரும் ஆவார். இவர் மின்காந்தவியல், மின்வேதியியல் ஆகிய துறைகளுக்குக் குறிப்பிடத்தக்க பங்களிப்புகளைச் செய்துள்ளார். இக்காலச் சோதனைச்சாலைகளில் சூடாக்குவதற்கான ஒரு கருவுயாக உலகளாவிய முறையில் பயன்படுகின்ற பன்சன் சுடரடுப்பின் ஆரம்ப வடிவத்தைக் கண்டுபிடித்தவரும் இவரே.

பாதியிலேயே பள்ளிப்படிப்பைவிட்ட ஃபாரடே தனது விஞ்ஞான ஆர்வத்தாலும், சுய முயற்சியாலும் புதிய கண்டுபிடிப்புகளை நிகழ்த்திச் சாதனை புரிந்தார். மின்னியலில் அவர் கண்டுபிடித்த விஷயங்கள் அவரது ஆய்வுகள், அவற்றைத் தொடர்ந்து பலரும் மேற்கொண்டு வரும் ஆய்வுகளின் பலன்களை இன்று உலகம் முழுவதும் உள்ள மக்கள் அன்றாடம் பயன்படுத்தி வருகின்றனர்.. இவருடைய முயற்சிகளின் காரணமாகவே மின்சாரம் பொதுவான பயன்பாட்டுக்கு உகந்த ஒன்றாக உருவானது எனலாம்.